မျက်စိဝေဒနာရှင် ၂ သောင်းခန့်က အခမဲ့ကုသမည် ဆိုသော ကြံ့ဖွံ့ကို ယုံကြည်မှုကင်းမဲ့

ဒေသအတွင်း၌ အခမဲ့ မျက်စိရောဂါကုသပေးမည်ဟု ကချင်ပြည်နယ် မိုးညှင်းမြို့နယ် ကြံ့ဖွံ့အသင်းက ဖိတ်ကြား လိုက်သဖြင့် မျက်စိဝေဒနာရှင် ၂ သောင်းကျော်ခန့် ဆေးကုသမှုခံယူရန် လာရောက်ခဲ့ကြောင်း သိရသည်။

အဆိုပါ ကုသမှုအစီအစဉ်ကို မိုးညှင်းမြို့တွင် နိုဝင်ဘာလ ၁၆ ရက်နေ့မှ ၁၉ ရက်နေ့အထိ ၄ ရက်ကြာ ပြုလုပ်ခဲ့ ရာ ဝေဒနာရှင်ရာပိုင်းမျှကိုသာ ကုသနိုင်ခဲ့သဖြင့် ကျန်နေသော လူအများစုက ငွေကုန်လူပမ်းဖြစ်ကာ ယုံကြည်မှု ကင်းမဲ့ လျှက်ရှိကြောင်း ဒေသခံများ ကပြောသည်။
ကြံ့ခိုင်ဖွံ့ဖြိုးရေးအသင်းသူ
ကြံ့ဖွံ့အသင်းက လာမည့် ၂၀၁၀ ခုနှစ် ရွေးကောက်ပွဲအတွက် စည်းရုံးသည့်အနေဖြင့် ကချင်ပြည်နယ် နှင့် စစ် ကိုင်းတိုင်းအထက်ပိုင်း ဒေသများဖြစ်သော ကသာ ၊ မော်လူး ၊ မော်ဟန် ၊ မိုးညှင်း ၊ အင်းတော် နယ်တ၀ိုက်ရှိ မျက်စိဝေဒနာရှင်များကို ဖိတ်ခေါ်ခဲ့ခြင်းဖြစ်ကြောင်း မိုးညှင်းဒေသခံတစ်ဦးက သျှမ်းသံတော်ဆင့် သို့ ပြောသည်။

“မျက်မှန်တွေလည်း အလကားပေးမယ် ဆေးလည်းကုပေးမယ်ဆိုပြီး ပရမ်းပတာဖိတ်လိုက်တဲ့အခါ လူက ၂ သောင်း လောက် ပတ်ဝန်းကျင်ဖြစ်သွားတယ် တပြုံကြီးကားတွေနဲ့ဘာတွေနဲ့ အဲလိုနဲ့လုပ်တဲ့အခါကျတော့ လာတဲ့ လူတွေက တည်းစရာနေစရာ စားစရာ ခက်တယ်လေ ဘုန်းကြီးကျောင်းတွေ စာသင်ကျောင်းတွေမှာ အဲဒီလူတွေ ကို နေရာချ ထားတယ် ဟိုမှာ မနိုင်မနှင်းဖြစ်ပြီ တန်းစီရတာဆိုလို့ရှိရင်တစ်နေလုံးမနက်ကနေတန်းစီရတာဟိုကလုပ် တဲ့ လူက လည်းမနိုင်ဘူး မကုရပဲနဲ့ပြန်သွားတယ် တချို့များဆို ဆဲကိုသွားတယ် ” လို့ ဒေသခံက ပြောသည်။

၎င်းအပြင် ဆေးကုသမှုခံယူမည့် ဝေဒနာရှင်များထံမှာ ငွေကြေး တောင်းယူမှုများရှိခဲ့သေးကြောင်း သိရသည်။

“ရှင်းရှင်းပြောမယ်ဆိုရင်တော့ လိုက်အုပ်ကြတာပေါ့ဗျာ အုပ်ကြတော့ ဒီမှာမဲရွေးမယ်ဆိုတဲ့ ဗိုလ်မှူး ဟောင်း ညွန့်အောင် က ဘာပြောသလဲဆိုရင် စားတော့စားကြပေါ့ကွာ ဒါပေမဲ့ဘ၀ပျက်အောင်တော့မလုပ်နဲ့လို့ အဲလောက် တောင်ပါးစပ်ကငြီးတယ်လို့ပြောတယ် တချို့က အကြီးအကျယ်ဒေါကန်တယ် တကယ်ကုမလား ဆိုပြီးလာခဲ့ တာလေ ဒီမှာကျတော့ ထင်သလိုမဖြစ်ဘူးပေါ့ တချို့ဆို ညကြီးကားတွေနဲ့ပြန်ကြတာလေ တချို့ဆိုစားစရာမရှိဘူး လေ ထောင်ကြီးသောင်းငွေတာကုန်ပြီးလာတာ ဘာမှအကျိုးမဖြစ်ဘူးလေ ” သူက ဆက်ပြောသည်။

ဝေဒနာရှင်များကဒေါသထွက်ကာ အိမ်ပြန်သွားသော်လည်း ကြံ့ဖွံ့အသင်းက လူသောင်းနှင့်ချီလာရောက်ခဲ့ သော ယခုစည်းရုံးရေးအစီအစဉ်ကို အောင်ပွဲခံသည့် အနေဖြင့် နိုဝင်ဘာလ ၂၅ ရက်နေ့ က မိုးညှင်းမြို့ကြံ့ဖွံ့ရုံးတွင် ညစာစားပွဲကျင်းပခဲ့ကြောင်း သိရသည်။

“နံမည်ကြီးတဲ့ ရွှေမြင်တင်ဘုရားကို လိုက်ပို့တယ် ဆရာဝန်တွေကို ကျွေးမွေးတယ် ပြန်သွားပြီးတော့ တနေ့ က ကြံ့ဖွံ့ ရုံးမှာ Dinner party ပါတီပေးတယ် လုပ်အားပေးခဲ့တဲ့သူတွေကို တချို့ ၅,၀၀၀ တို့ တချို့ ၁၀,၀၀၀ တို့ အဲလိုပေးတယ်” လို့ စောစောက ဒေသခံက ပြောသွားသည်။

သျှမ်းသံတော်ဆင့်

မျက်စိဝေဒနာရှင် ၂ သောင်းခန့်က အခမဲ့ကုသမည် ဆိုသော ကြံ့ဖွံ့ကို ယုံကြည်မှုကင်းမဲ့

RSS ဖတ်ရန်

နောက်ဆုံးသတင်း

အဖတ်များဆုံး

အခြားဆိုဒ်များ

ဂွဏ်းခေါ်စာစောင်

ဂွဏ်းခေါ် ဒီဇင်ဘာ ၂၀၀၉

ကာတွန်း