သျှမ်းသံတော်ဆင့်

ခမ္တီးထောင်၌ ထောင်ဒဏ် ၁၀၆ နှစ် ကျခံနေရသူ SSA အပစ်ရပ်ခေါင်းဆောင် ဗိုလ်ချုပ်ဆေထဲန့် ပုံမှန်ဆေးစစ်ခွင့် မရကြောင်း မိသားစုဝင်တဦး၏ပြောပြချက်အရ သိရပါသည်။

“ပုံမှန်ဖြစ်နေတဲ့ရောဂါက မျက်စိကတိမ်ဖုံးတယ် အနီ အစိမ်း အ၀ါ ခွဲလို့မရဘူး၊ မိုးတွင်းတလျှောက်လုံးခံလာရတာက ငှက် ဖျားရောဂါ၊ ဂျူလိုင်လတုန်းက စဖြစ်တယ်။ အသည်းအသန်ဖြစ်ချိန်က စိုးရိမ်အဆင့် ၂ လို့ပြောတာဘဲ၊ နောက်ပိုင်း ပုံမှန် ဆေးစစ်ခွင့် မပေးတော့ဘူး” - ဟု ထောင်ဝင်စာသွားတွေ့လာသည့် သမီးဖြစ်သူ ခမ်းပေါဝ်း ကပြောပါသည်။

ယခုလ ၁၅ ရက် မှ ၂၂ ရက်အထိ စစ်ကိုင်းတိုင်းအထက်ပိုင်း ခမ္တီးထောင်၌ ကျခံနေရသူ ဗိုလ်ချုပ်ဆေထဲန်အား သမီးဖြစ်သူ နန်းခမ်းပေါဝ်း နှင့် မိခင် (ဗိုလ်ချုပ်ဆေထဲန်၏ ဇနီး) တို့နှစ်ဦး ထောင်ဝင်စာသွားတွေ့ခဲ့ကြောင်း သိရပါသည်။

“ကျမတို့ ခမ္တီးမှာ ၅-၆ ရက်နေရပေမဲ့ ၁၈ ရက် (ဗုဒ္ဓဟူးနေ့) နေ့လည်ပိုင်း ၁ နာရီကျမှ ၄၅ မိနစ်လောက်ဘဲ အဖေ နဲ့တွေ့ခွင့်ရတယ်။ ဘာမှ ပြောဆိုတိုင်ပင်ခွင့်မရဘူး။ အဖွဲ့အစည်းအကြောင်းမပြောနဲ့ မိသားစုအရေးတောင်ဘာမှ မပြောပြလိုက်ရဘူး၊ ခရီးတခေါက်သွားရင် မယုတ်မလွန် ၂ ခါ ၃ ခါလောက်ပေးတွေ့ရင် ကောင်းတာပေါ့” - ဟု သမီးဖြစ်သူ က ဆက်ပြော ပြ၏။

လူတယောက်အတွက် ရန်ကုန် - ခမ္တီး အသွားအပြန်  တသိန်းခွဲကုန်ကျသောကြောင့် ဗိုလ်ချုပ်ဆေထဲန်အား မိသားစုဝင် များ တလတခါသွားတွေ့ရန် ခက်ခဲကြောင်း၊ “ခြောက်လ ခုနှစ်လမှ တကြိမ်သွားလို့ ရတယ်၊ ဘာဘဲဖြစ်ဖြစ်အဖေက အပြစ်ရှိတာမဟုတ်ဘူး၊ အဖေ့က အသက်ကြီးပြီလေ၊ အဖေအပါအ၀င် ဒေါ်စုနဲ့ သျှမ်းခေါင်း ဆောင်တွေ၊နိုင်ငံရေး အကျဉ်း သားတွေအားလုံး လွတ်ငြိမ်းချမ်းသာခွင့် မြန်မြန်ရပါစေလို့ဘဲဆုတောင်းတယ်” - ဟုနန်းခမ်းပေါဝ်း က သျှမ်းသံတော်ဆင့် သို့ ပြော၏။

ထို့အတူ သျှမ်းပြည်မြောက်ပိုင်းသတင်းရပ်ကွက်ကလည်း အပစ်ရပ်မြောက်ပိုင်း SSA အား ဒေသကာကွယ်ရေးတပ် HGF (Home Guard Force) အဖြစ် ဒီဇင်ဘာ နောက်ဆုံးထား အသွင်ပြောင်းရန် စစ်အစိုးရက ဗိုလ်ချုပ်ဆေထဲန့် လွတ်မြောက်ရေး နှင့် အပေးအယူကမ်းလှမ်းထားကြောင်း၊ ဗိုလ်ချုပ်ဆေထဲန့်အတွက် ယခုလဆန်းမှစ၍ SSA-N  ဌာနချုပ်က ဆိုင်ကျော့ဝ် တွင် အိမ်အကောင်းစားတလုံးကြီးစဆောက်လာကြောင်း ဆို၏။

 “အဲဒီ့ကိစ္စနဲ့ ပတ်သက်ပြီး ကျမတို့ဘာမှမသိပါဘူး၊ အဖေနဲ့တွေ့တဲ့အချိန်ကလဲ နည်း နည်းဘဲဆိုတော့ အခြားကိစ္စဘာမှ မပြောဖြစ်ဘူး” - ဟု သမီးဖြစ်သူက ပြောပြသည်။

၂၀၀၅ နှစ်ဆန်းပိုင်းတွင် မြန်မာစစ်တပ်မှ သျှမ်းပြည်အတိုင်အပင်ခံကောင်စီဖွဲ့စည်းရန်ကိစ္စအကြောင်းပြု ၍ ဗိုလ်ချုပ်ဆေထဲန်၊ SNLD ဥက္ကဌ စ၀်ခွန်ထွန်းဦး နှင့် သျှမ်းခေါင်းဆောင် ၇ ဦးအား နိုင်ငံတော်ပုန်ကန်မှုပြည်ထောင်စုမှ ခွဲထွက်ရန် ကြံစည်မှုနှင့် အခြားအမှုပေါင်းများစွာ စွပ်စွဲပြီးဖမ်းဆီးထောင်ချခဲ့သည်။ ဗိုလ်ချုပ်ဆေထဲန့်အား ထောင်ဒဏ် ၁၀၆ နှစ် စ၀်ခွန်ထွန်းဦးအား ၉၃ နှစ်၊SNLD အထွေထွေအတွင်းရေးမှူး စိုင်းညွန့်လွင် ၈၅ နှစ်နှင့်အခြားခေါင်းဆောင် များအားလည်း အနည်းဆုံးထောင် ဒဏ် ၇၅ နှစ်ပြစ်ဒဏ်ပေးခဲ့သည်။